Kryetari i Komunës së Malishevës, Ekrem Kastrati, ka reaguar ndaj ndërprerjeve të shpeshta të energjisë elektrike, duke shprehur shqetësim për ndikimin e madh që kjo situatë po ka te qytetarët dhe bizneset lokale.
Ai ka theksuar se problemet me furnizimin me rrymë janë shqetësuese në këtë periudhë, për shkak të temperaturave të ulëta, festave të fundvitit dhe ardhjes së mërgatës.
Sipas tij, mungesa e energjisë elektrike po ndikon drejtpërdrejt në jetën e përditshme të qytetarëve, funksionimin e shkollave, institucioneve shëndetësore dhe shërbimeve komunale, si dhe po shkakton humbje ekonomike për bizneset.
Kastrati i ka bërë thirrje Qeverisë së Kosovës që ta trajtojë me prioritet situatën energjetike në Malishevë dhe të ndërmarrë masa konkrete për sigurimin e një furnizimi të qëndrueshëm me energji elektrike.
Po ashtu, ai ka kërkuar nga KEDS dhe KESCO sqarime të qarta lidhur me ndërprerjet dhe ndërhyrje urgjente teknike për evitimin e mungesës së energjisë.
“Qytetarët e Malishevës meritojnë trajtim të barabartë, ashtu si çdo komunë tjetër e vendit. Furnizimi me energji elektrike është shërbim bazik dhe e drejtë themelore, e cila duhet të garantohet pa përjashtime”, ka shkruar ai në Facebook.
