Sulmuesi shqiptar Armando Broja e ka falënderuar bashkëlojtarin e tij për asistin perfekt, i cili i dha fund ecurisë së gjatë pa gola në Premier League.
Pas një periudhe sfiduese për sulmuesin e talentuar, Broja u shndërrua në heroin e barazimit 1-1 të Burnley-t ndaj Bournemouth, duke shënuar në “frymën e fundit” të ndeshjes për t’ia siguruar një pikë të vlefshme skuadrës së tij.
Ky gol ka një rëndësi të veçantë për yllin shqiptar, pasi ishte i pari për të në kampionatin anglez pas afro dy vitesh.
Broja nuk e fshehu lumturinë dhe mirënjohjen ndaj bashkëlojtarit që e asistoi, Marcus, duke theksuar se ky moment i jep motivim të madh për të vazhduar me formën e tij më të mirë.
“Ishte një asistim perfekt dhe isha shumë i lumtur kur e pashë topin që të hynte në rrjetë. Kjo do të thotë shumë për mua. Tani duhet të vazhdoj dhe shpresoj që të shënoj akoma më shumë gola të tjerë,” deklaroi sulmuesi i Kombëtares së Shqipërisë.
Ky barazim është një rezultat i rëndësishëm për Burnley-n, që këtë edicion po lufton për mbijetesë në Premier League.
Broja shpreson që kjo të shërbejë si një pikë kthesë në sezonin e tij, duke rikthyer besimin dhe ritmin e golave për skuadrën angleze dhe për Kombëtaren shqiptare.
