Edhe kësaj radhe, si çdo herë pas përfundimit të secilës xhiro, Federata e Futbollit e Kosovës ka ndarë çmimin e “Yllit të Javës”.
E për xhiron e 18-të të elitës së futbollit kosovar, ky epitet i ka takuar futbollistit të Ferizajt, Betim Haxhimusa.
Në ndeshjen e zhvilluar të shtunën, Ferizaj triumfoi me rezultatin 2:1 ndaj Llapit, për të marrë tre pikë të rëndësishme në garën për mbijetesë në Superligë.
Haxhimusa pati një paraqitje shumë të mirë për skuadrën e tij gjatë 90 minutave të ndeshjes, duke shënuar të dy golat kundër KF Llapit.
Me këto statistika, Haxhimusa u nderua me epitetin “Ylli i Javës”, që u përzgjodh nga komisioni i veteranëve të futbollit.
Pasi mori këtë çmim, Haxhimusa u shpreh i lumtur që u vlerësua si lojtari më i mirë i javës:
“E kemi përgatitur ndeshjen shumë mirë, duke u fokusuar në pikat e forta të KF Llapi. Ky ka qenë një rezultat shumë i nevojshëm për ne, pasi vinim nga një seri negative. Me trajnerin e ri dhe me filozofinë e tij, jemi përshtatur dhe besoj se në stinorin e ri do të kemi vetëm rezultate pozitive. Është kënaqësi e madhe të shpallem më i miri i xhiros së 18-të; për këtë i falënderoj bashkëlojtarët, stafin e trajnerëve, komisionin që më përzgjodhi dhe familjen time për përkrahjen.” Tha Haxhimua për FFK-në.
Ferizaj momentalisht ndodhet në pozitën e 9-të tabelare me 19 pikë, 4 më shumë se Prishtina e Re, që renditet e fundit.
