Policia e Kosovës ka bërë të ditur se persona ende të paidentifikuar kanë tentuar t’i vënë zjarrin një restoranti në fshatin Reçan të Prizrenit.
Sipas njoftimit zyrtar, rasti është raportuar në intervalin kohor mes orës 00:30 dhe 03:15 të datës 20 dhjetor 2025. Gjatë ndërhyrjes në vendin e ngjarjes, policia ka gjetur në afërsi të restorantit një mjet shpërthyes të pajisur me fitil ndezës dhe material eksploziv.
Njësiti policor për trajtimin e mjeteve shpërthyese (IEDD) ka dalë në terren dhe ka konstatuar se mjeti ishte i punuar në mënyrë artizanale. Autoritetet dyshojnë se ky nuk është rasti i parë, pasi edhe rreth një javë më parë ishte raportuar një tentativë e ngjashme për zjarrvënie ndaj të njëjtit lokal.
Nuk raportohet për persona të lënduar, ndërsa rasti është duke u trajtuar dhe hetuar nga njësitë relevante policore.
