Gjykata Themelore në Prishtinë ka aprovuar kërkesën e Prokurorisë Speciale dhe ka caktuar masën e paraburgimit prej 30 ditësh ndaj ish-ministrit të Zhvillimit Ekonomik, Fadil Ismajli, si dhe gjashtë personave të tjerë të arrestuar në një aksion policor të zhvilluar të enjten.
Në mesin e të ndaluarve është edhe një gjyqtar i Gjykatës Themelore që ka ushtruar funksionin në Graçanicë, Jovica Mitroviq, si dhe zyrtarët N.K., M.D., B.D., Sh.T. dhe G.L.
Seanca dëgjimore është mbajtur të shtunën dhe ka zgjatur për disa orë, ndërsa vendimi për paraburgim është bërë i ditur në orët e mbrëmjes.
Sipas njoftimit zyrtar të Gjykatës Themelore – Departamenti Special, të pandehurit dyshohen për vepra penale që përfshijnë marrje dhe dhënie ryshfeti, si dhe ushtrim ndikimi.
Sipas dosjes së Prokurorisë Speciale, të dyshuarit në periudhën 2023–2025 dyshohet se kanë vepruar në mënyrë të kundërligjshme për përfitime personale, përmes procedurave të kompensimit për prona të shpronësuara, duke shkelur legjislacionin në fuqi dhe duke iniciuar ankesa jashtë afateve ligjore.
“Gjykata Themelore në Prishtinë, Departamenti Special ka vendosur lidhur me kërkesën e Prokurorisë Speciale të Republikës së Kosovës, për caktimin e masës së paraburgimit në çështjen penale ndaj të pandehurit N.K. për shkak të dyshimit të bazuar se ka kryer veprën penale Marrja e ryshfetit, e pandehura M.B.-D për shkak të dyshimit të bazuar se ka kryer veprën penale Dhënia e ryshfetit si dhe veprën penale Ushtrimi i ndikimit, i pandehuri Sh.T. për shkak të dyshimit të bazuar se ka kryer veprat penale Dhënia e ryshfetit si dhe veprën penale Ushtrimi i ndikimit, i pandehuri G.L. për shkak të dyshimit të bazuar se ka kryer veprat penale Dhënia e ryshfetit si dhe veprën penale Ushtrimi i ndikimit, i pandehuri F.I.për shkak të dyshimit se ka kryer veprën penale Dhënia e ryshfetit, i pandehuri J.M. për shkak të dyshimit të bazuar se ka kryer veprën penale Marrja e ryshfetit si dhe i pandehuri B.D. për shkak të dyshimit të bazuar se ka kryer veprat penale Dhënia e ryshfetit si dhe veprën penale Ushtrimi i ndikimit”, thuhet në njoftim. “Gjykata vlerësoj se caktimi i masës së paraburgimit në këtë çështje penale është masë adekuate dhe konstatoi se masa e paraburgimit tani për tani është e vetmja masë për rrjedhjen e pa penguar të procedurës penale në këtë çështje juridiko – penale”.
