Komisioni Qeveritar për Persona të Zhdukur, pas analizimit të të dhënave të siguruara nga arkivat ndërkombëtare me përkrahjen e Komitetit Ndërkombëtar të Kryqit të Kuq, ka iniciuar aktivitete kërkimore në një lokacion në rajonin e Rahovecit, i njohur si “Përzhina”, në afërsi të varrezave të qytetit.
Sipas planifikimeve operacionale, gërmimet kanë nisur ditën e djeshme, ku janë gjetur dy pjesë eshtrore, të cilat janë dërguar për ekzaminim në Institutin e Mjekësisë Ligjore. Ndërkaq, gjatë ditës së sotme, janë gjetur mbetje mortore të paktën të një individi, për të cilat dyshohet se mund t’i përkasin viktimave të luftës dhe mund të jenë pjesë e listës së personave të zhdukur.
Gërmimet po realizohen nga Instituti i Mjekësisë Ligjore, Sektori për Hetimin e Personave të Zhdukur Gjatë Luftës në kuadër të Drejtorisë së Policisë për Hetimin e Krimeve të Luftës, si dhe Komisioni Qeveritar për Persona të Zhdukur.
Meqë ky lokacion konsiderohet si lokacioni i fundit i adresuar në kuadër të gërmimeve vlerësuese të planifikuara për vitin 2025, Komisioni ka njoftuar se ditën e nesërme, më 19 dhjetor 2025, duke filluar nga ora 11:00, do të mbahet një prononcim për media nga vetë lokacioni.
“Komisioni Qeveritar për Persona të Zhdukur dhe institucionet e tjera të angazhuara në këtë proces mbeten të përkushtuara në zbardhjen e fatit të personave të zhdukur dhe në informimin e rregullt të opinionit publik, duke respektuar ndjeshmërinë e procesit dhe dinjitetin e viktimave dhe familjeve të tyre”, thuhet në njoftimin e Komisionit Qeveritar për Persona të Zhdukur.
