Kryeministri i Shqipërisë, Edi Rama, ka bërë të ditur se është nisur drejt Hagës, ku pritet të zhvillojë një takim me ish-presidentin e Kosovës, Hashim Thaçi, i cili ndodhet në paraburgim pranë Dhomave të Specializuara.
Rama theksoi se kjo vizitë vjen pas një periudhe kohore nga takimi i tij i fundit me Thaçin, duke e cilësuar ish-presidentin si një nga figurat kryesore të luftës së Ushtrisë Çlirimtare të Kosovës dhe si president të zgjedhur në mënyrë demokratike.
Ai u shpreh kritik ndaj procesit gjyqësor, duke vlerësuar se Thaçi po mbahet prej vitesh në paraburgim, në rrethana që sipas tij përbëjnë shkelje të standardeve ndërkombëtare të drejtësisë dhe të drejtave të njeriut.
Rama e ka cilësuar këtë proces si një “farsë”, duke theksuar se pavarësisht mungesës së një vendimi përfundimtar, Thaçi dhe tre ish-zyrtarë të tjerë të lartë të Kosovës vazhdojnë të mbahen në paraburgim. Sipas tij, ky fakt përbën një cenim të parimit të procesit të rregullt ligjor.
Kryeministri shqiptar ka shprehur gjithashtu kritika të ashpra ndaj dëshmitarëve të paraqitur nga prokuroria, ndërsa ka vlerësuar dëshmitë e ofruara nga pala mbrojtëse, duke i cilësuar ato si serioze dhe bindëse.
Ai theksoi se tashmë ka përfunduar faza e paraqitjes së provave nga ana e akuzës, si dhe dëshmitë e palës mbrojtëse, dhe se procesi ndodhet në pritje të vendimit përfundimtar.
Në fund, Rama shprehu shpresën që viti i ardhshëm të shënojë përmbylljen e këtij procesi, duke e cilësuar atë si një kapitull të dhimbshëm dhe të diskutueshëm të drejtësisë ndërkombëtare.
“Jam rrugë për në Hagë ku do të takoj pas disa kohësh nga takimi i mëparshëm komandantin e UÇK-së, presidentin e Kosovës, i cili u mor nga zyra e tij dhe mbahet peng prej tanimë vitesh në një qeli të drejtësisë ndërkombëtare. Për turpin e madh të gjithë atyre që sponsorizojnë atë lloj drejtësie, ku shkeljet e standardeve, shkeljet e të drejtave të njeriut, shkeljet e të gjitha normave të procesit të rregullt ligjor janë e vetmja normë që ka karakterizuar këtë farsë. Ende opau, dënuar një president i zgjedhur demokratikisht nga populli, së bashku me tre bashkëluftëtarë që kanë mbuluar detyra të rëndësishme në Kosovë, mbahen të mbyllur, të izoluar”.
