Një person është gjetur pa shenja jete të mërkurën paradite në fshatin Serbicë e Ulët të Prizrenit.
Sipas Policisë së Kosovës, rasti është raportuar sot, më 17 dhjetor 2025, rreth orës 11:35, kur autoritetet janë njoftuar se në fushën e këtij fshati është vërejtur një person i shtrirë pa shenja jete.
Viktima është identifikuar si M.K., 57 vjeçar, mashkull.
Zëdhënësi i Policisë për rajonin e Prizrenit, Shaqir Bytyqi, tha për teve1.info se nga shikimi fillestar është vërejtur një plagë e shkaktuar nga arma e zjarrit në trupin e viktimës.
“Sot, më datë 17.12.2025, rreth orës 11:35, Policia ka pranuar informatën se në fushën e fshatit Serbicë e Ulët, në Prizren, është vërejtur një person pa shenja jete. Njësitet policore dhe emergjenca mjekësore kanë dalë në vendin e ngjarjes, ku ekipi mjekësor ka konstatuar vdekjen e personit. Nga shikimi fillestar është vërejtur se viktima ka një plagë të shkaktuar nga arma e zjarrit në trup, ndërsa në afërsi të trupit është gjetur një armë zjarri – pistoletë”, ka njoftuar Bytyqi.
Ai tha se Prokurori kompetent është njoftuar dhe veprimet e mëtejme do të ndërmerren në përputhje me udhëzimet e tij. Hetimet janë në vazhdim me qëllim të sqarimit të plotë të rrethanave të rastit.
