Kandidati për deputet nga partia Guxo, Nezir Kraki, ka folur në emisionin “Këndi i Debatit” në Tëvë1 për raportet politike mes LDK-së dhe Guxos, si dhe për reagimet e kësaj partie pas zhvillimeve të fundit politike.
Kraku vlerësoi se LDK-ja po kalon një fazë dobësimi dhe se kjo, sipas tij, po reflektohet në reagimet publike ndaj Guxos.
“Unë mendoj që LDK-ja është Guxo pa frymë”, ka deklaruar Kraki.
Analisti politik Xhevdet Pozhari e pyeti Krakun lidhur me reagimet e ashpra të LDK-së pas vizitës në Mitrovicën e Veriut, duke përmendur edhe deklaratat për një përfshirje të mundshme të presidentes Vjosa Osmani në partinë Guxo.
“Reagimet më të ashpra i kemi parë pas vizitës në Mitrovicën e Veriut. Pse gjithë ky sulm? Pashë një reagim të rëndë të LDK-së, ku pretendohej se në të ardhmen Vjosa Osmani mund të bëhet pjesë e Guxos dhe se potencialisht do të vazhdojë fuqizimi i Guxos dhe rënia e LDK-së”, ka thënë Pozhari.
Duke iu përgjigjur kësaj, Kraku tha se një profil si ai i Vjosa Osmanit do të ishte pozitiv për skenën politike, por theksoi se aktualisht nuk ka pasur bisedime konkrete.
“Një profil si Vjosa Osmani, nëse ajo rikthehet në politikën aktive, do të ishte një pasqyrim i mirë. Nuk kemi pasur biseda të tilla, por unë kam respekt për të dhe, nëse kthehet në politikë aktive, e vlerësoj”, u shpreh Kraki.
Sipas tij, sulmet më të shpeshta të LDK-së ndaj Osmanit lidhen me bindjen se ajo po e mbështet vetëm partinë Guxo.
“Arsyeja pse LDK-ja e sulmon më së shumti Vjosa Osmanin është sepse ata mendojnë se ajo po e mbështet vetëm partinë ‘Guxo’”, përfundoi Kraki.
