Autore: Jona Kelmendi
Në disa lagje të Pejës, banorët thonë se ecja deri te vendi i punës po u shndërrohet në sfidë.
E Zeqë Kastrati është një prej tyre. Ai tregon se çdo ditë duhet ta shoqërojë bashkëshorten e tij, sepse zona ku kalon ajo ka shumë qenë endacakë.
“Unë po ta tregoj maspari problemin tem që e kom me gruan që duhet me shku me përcjell, edhe më duhet me prit se anej ka frekuenton gruaja jem ka shumë qenë dhe ka frikë, nuk e di ka ndonjë zgjidhje se niherë u pakun me ni situatë ndoshta para disa muajve fillun me i mbledh s’di ka i qun, po kush po i bjen prej dikah tjetër nuk e di”, shprehet Zeqë Kastrati – qytetar
Kjo situatë, edhe sipas qytetarëve tjerë, është e njëjta që një kohë të gjatë.
“Është shumë shqetësuese se disa herë ka pas sulme të fëmijëve, grave, të moshuarve. Nuk e di komuna a ka ndërmarrë diçka pasi gjendja është e njëjta”, shprehet Mehmet Shala.
“Është pak e tmerrueshme, ka pas kërkesa shumë herë, pak janë marrë me këto sene, ka probleme më së shumti me fëmijët nëpër shkolla, me qytetarët, pastaj afër spitalit është vështirë me kalu kështu që e kanë neglizhu”, thotë Asllan Juniku.
Nga Komuna e Pejës thonë se buxheti është ndarë, dhe trajtimi i qenve endacakë është duke u zhvilluar në bazë të legjislacionit në fuqi.
“Ne si komunë menjëherë qe e kemi marrë në bazë të udhëzimit që na ka udhëzu Ministria e ka pru faktikisht si kompetencë në komunë, na i kemi marrë veprimet e para do të thotë, kemi nda buxhet kemi një kontratë me operatorë tre vjeçar i cili ka fillu këtë vit, ku është duke vazhdu trajtimi i tyre bazë të ligjit në fuqi. Ne gjithashtu jemi në përfundim madje thuajse ka përfunduar ndërtimi i ambulancës veterinare”, thotë Tahir Shala, drejtor i Drejtorisë së Bujqësisë.
Ky problem edhe sipas komunës së Pejës është i kamotshëm, por që presin që çdo vit të ketë numër më të vogël të tyre.
