Viti 2026, parashihet të jetë sfidues për shumë institucione publike.
Mungesa buxhetore, vlerësohet se do të ndikojë në të gjitha këto institucione, nëse nuk bëhen lëvizje deri në fund të muajit shkurt.
Në këtë situatë, ndodhet edhe Agjencia për Parandalimin e Korrupsionit.
“Sfidë mbetet viti i ardhshëm, se si do të punojmë duke pasur parasysh se ende nuk jemi të informuar për buxhetin se si do të jetë për vitin pasues dhe cilat do të jenë lejimet buxhetore brenda Agjencisë”, tha Yll Buleshkaj – drejtor i APK-së.
Shkaku i mungesës së formimit të komisioneve parlamentare, ky institucion këtë vit ka punuar pa monitorim nga Kuvendi i Republikës së Kosovës.
Megjithatë, punë rezulton se janë kryer brenda këtij institucioni falë edhe sinjalizuesve të shkeljeve.
“Kemi vënë në funksion sistemin për raportim të korrupsionit, i cili është një sistem mjaft i avancuar i cili është vënë në funksion në fillim të këtij viti dhe tashmë kemi rezultatet e para. Ka shumë raste të raportuara, ka raste të cilat mund të monitorohen në mënyrë automatike, online. Dhe është krijuar si mekanizëm shumë lehtë i përdorshëm nga ata që duan të raportojnë qoftë konflikt interesi, qoftë verifikim të pasurisë, qoftë ndonjë sinjalizim apo ndonjë shkelje tjetër që evidentohet. Në anën tjetër, po ashtu kemi pasur rritje të raporteve të sinjalizimit, është një rritje gati 100% në krahasim me vitin e kaluar”, u shpreh Buleshkaj, raporton Tëvë1.
Këtë vit, kjo Agjenci pritet që ta mbyllë me krijimin e një sistemi të ri për deklarimin e pasurisë, në të cilin ka përfshirje më të madhe të publikut.
“Këtë vit jemi duke avancuar edhe sistemin për deklarimin e pasurisë. Në fund të këtij viti, po besoj se do të kemi sistem të ri, i cili është i bazuar në teknologjitë më të reja. Sistemi i ri do të ketë edhe anën e publikut, ku publiku do ta shoh në mënyrë të vazhdueshme dhe transparente numrat e deklarimeve”, tha ai.
Mandati i kësaj agjencie është zbatimi i ligjeve në kuadër të parandalimit të korrupsionit.
