Kryetari i Aleancës për Ardhmërinë e Kosovës, Ramush Haradinaj, ka përkujtuar 27-vjetorin e rënies së Mujë Krasniqit dhe 41 ushtarëve të Ushtrisë Çlirimtare të Kosovës, duke theksuar se ata ranë në male duke mbrojtur pragun e shtëpisë dhe nderin e atdheut.
Në një postim në Facebook, Haradinaj ka theksuar se, krah për krah, pa iu trembur syri e të palëkundur, këta heronj u përjetësuan në historinë e lavdishme të luftës sonë çlirimtare.
“Aty ku jehuan krismat e pushkëve të Mujës me shokë e shoqe, aty u këndua kënga e lirisë. Krisma dhe këngë u bënë një për Kosovën e lirë. Pikërisht në përvjetorin e rënies së tyre, 20 vjet më vonë, amaneti u çu në vend, u themelua Ushtria e Kosovës, duke jetësuar ëndrrën tonë të kahmotshme. Rroftë Ushtria Çlirimtare e Kosovës. I përjetshëm qoftë kujtimi për dëshmorët e saj.Lavdi”, ka shkruar ai në Facebook.
Ndryshe, Mujë Krasniqi, i njohur si Komandant Kapuçi ra dëshmorë më 14 dhjetor 1998 së bashku me 41 ushtarët e tij në kufirin Kosovë–Shqipëri, pasi ranë në një pritë të organizuar nga forcat serbe./teve1.info/
