Kryetari i Aleancës për Ardhmërinë e Kosovës, Ramush Haradinaj, ka kujtuar 7 vjetorin e formimit të Ushtrisë së Kosovës, duke e cilësuar atë si një akt historik të rëndësishëm që kontribuoi në forcimin e sovranitetit dhe sigurisë së shtetit të Kosovës.
Në një postim të tij në Facebook, Haradinaj e ka vlerësuar këtë ngjarje si një vendim të rëndësishëm të Qeverisë së tij, që u mor me mbështetje nga Shtetet e Bashkuara të Amerikës.
“Erdhëm në paqe, në rresht me ushtritë e paqes.7 vite guxim, 7 vite krenari, 7 vite Ushtria e Kosovës krah nesh!Vendimi më i rëndësishëm i marrë nga Qeveria Haradinaj me bekimin e Shteteve të Bashkuara të Amerikës ishte krijimi i Ushtrisë së Kosovës, një akt historik që vulosi sovranitetin dhe sigurinë e shtetit tone”, ka shkruar ai.
Ai gjithashtu e ka përkujtuar kontributin e atyre që dhanë jetën për lirinë e Kosovës, duke shtuar se Ushtria e Kosovës lindi nga “gjaku i derdhur i dëshmorëve, nga bekimi i nënave, si dhe nga hapat e luftëtarëve që nuk u kthyen kurrë, por e lanë lirinë amanet.”
“E bëmë ushtrinë. E bëmë shtetin më të sigurt. E bëmë Kosovën më të forte”, ka përfunduar Haradinaj.
Ndryshe, Parlamenti i Kosovës me 106 vota pro dhe një abstenim, më 14 dhjetor 2018, miratoi tri ligjet që e ndryshojnë mandatin e Forcës së Sigurisë së Kosovës (FSK) në ushtri të Kosovës, por pa iu ndërruar emri.
