Javën e ardhshme në Bruksel do të mblidhen liderët e Ballkanit Perëndimor së bashku me përfaqësuesit e Bashkimit Evropian.
Presidenti i Këshillit Evropian, António Costa, ka deklaruar se ky samit do të shërbejë si një mundësi për të demonstruar dhe rikonfirmuar forcën e marrëdhënies strategjike BE–Ballkani Perëndimor, si dhe përfitimet që kjo marrëdhënie u sjell qytetarëve.
Shqipëria dhe Mali i Zi mbeten dy vendet që gjatë viteve të fundit kanë shënuar progres të dukshëm në rrugën e tyre drejt anëtarësimit në Bashkimin Evropian.
Ndërkohë, Kosova pritet të jetë një nga temat kryesore të diskutimit, pasi vendi vazhdon të mbetet nën masa ndëshkuese nga BE-ja.
Profesori Seb Bytyçi vlerëson se samiti po mbahet në një moment të përshtatshëm, duke pasur parasysh përfundimin e zgjedhjeve lokale në Kosovë dhe transferimin e qetë të pushtetit në katër komunat veriore.
Ai thotë se kjo situatë i jep Kosovës mundësinë të adresojë shqetësimet dhe kërkesat e saj lidhur me masat ndëshkuese.
“Samiti po mbahet në kohën e duhur, kur në Kosovë kanë përfunduar me sukses zgjedhjet lokale dhe ka ndodhur transferimi i pushtetit në katër komunat veriore. Tani Kosova mund t’i paraqesë kërkesat e veta për largimin e masave ndëshkuese nga Bashkimi Evropian”, deklaroi profesori Seb Bytyçi.
Sipas Bytyçit, pavarësisht mungesës së zgjerimit të BE-së për një kohë të gjatë, Shqipëria dhe Mali i Zi kanë bërë hapa të rëndësishëm përpara dhe mund të jenë anëtaret e ardhshme të bllokut.
“Në periudhën e fundit ka lëvizje pozitive me hapjen e kapitujve me Shqipërinë. Përparim në negociata ka shënuar edhe Mali i Zi, andaj këto dy shtete priten të bëhen anëtare të reja të BE-së”, tha ai.
Samiti i Brukselit pritet të japë sinjale të qarta për të ardhmen e zgjerimit, ndërsa BE-ja synon të forcojë ndikimin e saj në rajon në një kontekst të ri gjeopolitik.
