Zëdhënësi i Lëvizjes Vetëvendosje, Arlind Manxhuka, ka deklaruar se qëndrimi i subjektit të tij politik ndaj Listës Serbe mbetet i pandryshuar dhe thellësisht parimor.
Në një prononcim për Tëvë1, ai ka theksuar se Lista Serbe vazhdon të veprojë kundër institucioneve të Republikës së Kosovës.
“Qëndrimi ynë karshi Listës Serbe është parimor dhe konkret. Vota jonë karshi këtij subjekti politik vazhdon të jetë e njëjtë prej kohësh, dhe jo që nuk ka ndërruar asgjë për të ndryshuar mendje, por ky subjekt ka vazhduar intensitetin e luftimit institucional, dhe jo vetëm, të Republikës së Kosovës. Tutje, ata në kohën kur ndodhi sulmi terrorist i Banjskës, nënkryetar e kishin prijësin e atij sulmi, Milan Radoiçiq, dhe sot e asaj dite nuk janë distancuar nga ai akt. Për më tepër, ata për terroristët e vrarë kanë mbajtur edhe tri ditë zie”, ka thënë Manxhuka.
Manxhuka ka komentuar edhe vendimin e Panelit Zgjedhor për Ankesa dhe Parashtresa (PZAP) për certifikimin e Listës Serbe, duke theksuar se VV-ja nuk e sheh të arsyeshme ta dërgojë çështjen në Prokurori.
“Nuk ke çfarë dërgon në Prokurori kur tashmë ka të dhëna me bollëk në këtë drejtim. Por, fakti që PZAP apo kushdo vendos siç ka vendosur në raste tjera, kjo nuk e bën problematik votimin tonë parimor, por vetë vendimin e PZAP-it. Për aq kohë sa kërkohet votim, ne do të votojmë ashtu siç vlerësojmë se është në interes të përgjithshëm dhe shtetëror. Dhe ashtu do të duhej të votonin të gjithë”, ka theksuar ai./teve1.info/
