Sot, Komandanti i Misionit të NATO-s në Kosovë, Gjeneral Major Özkan Ulutaş, priti Presidentin e Hungarisë, Tamás Sulyok, në Kampin Film City, ku ndodhet selia e KFOR-it.
Sipas njoftimit zyrtar, në takim Ulutaş e ka informuar Sulyok për situatën e sigurisë në Kosovë dhe rajon, duke theksuar përkushtimin e vazhdueshëm të KFOR-it për të siguruar stabilitet dhe liri lëvizjeje për të gjithë qytetarët.
Ai gjithashtu ka falënderuar Hungarinë për kontributin e saj të gjatë dhe të qëndrueshëm në misionin e KFOR-it dhe për stabilitetin rajonal.
Në takim ishin të pranishëm gjithashtu Zëvendësministri hungarez i Mbrojtjes, Tamás Vargas, dhe Ambasadori i Hungarisë në Kosovë, László István Dux.
“Sot, Komandanti i misionit të udhëhequr nga NATO, KFOR, Gjeneral Major Özkan Ulutaş, u takua me presidentin e Hungarisë, Sh.T. Z. Tamás Sulyok, në selinë e KFOR-it në Kampin Film City, Prishtinë. Sh.T. Z. Sulyok shoqërohej nga Zëvendësministri hungarez i Mbrojtjes, Sh.T. Z. Tamás Vargas, dhe Ambasadori hungarez në Kosovë, Sh.T. Z. László István Dux. Gjeneral Major Ulutaş dha një përditësim mbi situatën e sigurisë në Kosovë dhe në mbarë rajonin, si dhe mbi përpjekjet e KFOR-it. Ai theksoi përkushtimin e palëkundur të KFOR-it për të kontribuar në siguri të qëndrueshme në mbarë Kosovën. Gjithashtu vlerësoi kontributet e vazhdueshme dhe afatgjata të Hungarisë për përpjekjet e KFOR-it dhe për stabilitetin rajonal. KFOR vazhdon të zbatojë mandatin e tij – bazuar në Rezolutën 1244 të Këshillit të Sigurimit të OKB-së të vitit 1999 – për të kontribuar në një ambient të sigurt dhe të qëndrueshëm për të gjithë njerëzit që jetojnë në Kosovë dhe për lirinë e lëvizjes, në çdo kohë dhe në mënyrë të paanshme. KFOR punon në koordinim të ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX), secili në rolin e vet si përgjegjës për sigurinë”, thuhet në njoftim.
