Dogana e Kosovës ka njoftuar se të hënën ka realizuar një kontroll operacional në një barnatore në Ferizaj, ku ka zbuluar një sasi të konsiderueshme barnash pa banderola dhe të futura jashtë procedurave të rregullta doganore.
Sipas njoftimit zyrtar, gjatë kontrollit janë konfiskuar 153 artikuj medicinalë të llojeve të ndryshme, përfshirë preparate që lëshohen vetëm me recetë, produkte terapeutike për trajtimin e sëmundjeve kronike, medikamente dermatologjike, antiepileptikë, antihipertensivë si dhe produkte të tjera farmaceutike të ndjeshme.
Autoritetet doganore kanë bërë të ditur se i gjithë malli është sekuestruar në përputhje me procedurat ligjore dhe është dërguar në depot doganore për trajtim të mëtejshëm.
Rasti është iniciuar si kundërvajtje doganore, në bazë të Kodit Doganor dhe Akcizave të Republikës së Kosovës.
“Dogana e Kosovës mbetet e përkushtuar në forcimin e kontrollit në tregun farmaceutik, me qëllim mbrojtjen e shëndetit publik dhe parandalimin e qarkullimit të barnave të pasigurta”, theksohet në njoftim.
