Ish-deputetja e Lidhjes Demokratike të Kosovës, Hykmete Bajrami, ka kritikuar Lëvizjen Vetëvendosje lidhur me çështjen e faturimit të energjisë elektrike, duke e quajtur këtë proces si një prej “hajnisë më të madhe që po u bëhet qytetarëve të Kosovës” gjatë këtij mandati.
Bajrami ka thënë se për arsye të gjetjeve dhe fakteve të publikuara gjatë këtyre ditëve sipas saj, LVV është në panik.
“Fatura e rrymës është hajnia më e madhe që po u bëhet qytetarëve të Republikës së Kosovës. Për shkak të gjetjeve dhe fakteve të publikuara këto ditë, LVV është në panik. Pas dështimit të konferencës së Armend Mujës, dje keni parë që doli në konferencë tashmë e “vet-quajtura ministre e ekonomisë”, zonja Rizvanolli, e cila nuk ka qenë në gjendje të zbardhë asnjë fakt, aq më pak të demantojë ndonjë prej fakteve që këto ditë i kemi shpërfaqur”, tha Bajrami gjatë konferencës për media./teve1.info/
