Dogana e Kosovës ka bërë të ditur se gjatë një kontrolli të realizuar në një barnatore në Prishtinë ka zbuluar një sasi të konsiderueshme barnash të ndryshme, të cilat mbanin banderola të shteteve të huaja dhe nuk ishin importuar në mënyrë të ligjshme.
Sipas njoftimit zyrtar, produktet farmaceutike nuk figuronin të kishin hyrë në Republikën e Kosovës përmes procedurave zyrtare doganore.
“Barnat e gjetura përbëjnë rrezik serioz për shëndetin e qytetarëve, pasi origjina, cilësia dhe kushtet e ruajtjes së tyre nuk janë të garantuara sipas standardeve të kërkuara”, thuhet në komunikatë.
Autoritetet doganore kanë sekuestruar të gjitha produktet e dyshimta dhe kanë nisur procedurat ligjore ndaj subjektit përgjegjës.
Ndërkohë, Dogana ka paralajmëruar se kontrollet do të vazhdojnë pa ndërprerje, me synim mbrojtjen e shëndetit publik dhe parandalimin e qarkullimit të barnave ilegale në treg./teve1.info/
