Në Shërbimin Klinik të Kardiokirurgjisë në QKUK është realizuar me sukses një nga ndërhyrjet më të avancuara në mjekësinë kardiokirurgjike – zëvendësimi i harkut të aortës me metodën e njohur botërisht Frozen Elephant Trunk (FET).
Krahas saj, mjekët kanë kryer edhe zëvendësimin e rrënjës së aortës përmes procedurës Bentall.
QKUK bën të ditur përmes një njoftimi se pacienti kishte qenë i operuar jashtë vendit dy vite më parë për një problem të aortës, por për shkak të përkeqësimit të gjendjes dhe dëmtimeve të reja, ishte krijuar nevoja për një ndërhyrje të re të ndërlikuar.
“Ekipa opertore e udhëhequr nga Prof. Dr. Omer Xhemali, drejtor i Kardiokirurgjisë së Spitalit Universitar të Cyrihut dhe njëkohësisht udhëheqës i Aleancës për Kardiokirurgji (Spitali Universitar i Cyrihut, Spitali i qytetit te Cyrihut dhe Spitali kantonal i Cyrihut), Dr. Petar Risteski dhe anesteziologia Dr. Bettex Dominique, së bashku me ekipen vendore të Kardiokirurgëve dhe Anesteziologëve të Shërbimit Klinik të Kardiokirurgjisë kanë realizuar Frozen elephant trunk dhe Bentall procedurë, operacion i kryer për herë të parë në Kosovë”, thuhet në njoftim.
QKUK thekson se kjo ndërhyrje përbën një hap të madh për avancimin e kardiokirurgjisë në Kosovë dhe vjen si rezultat i bashkëpunimit me institucionet mjekësore të nivelit të lartë në Evropë, si Spitali Universitar i Cyrihut.
Stafi i kardiokirurgjisë njofton se pacientët që përballen me probleme të zemrës mund t’i drejtohen QKUK-së, duke theksuar se gjithnjë e më pak do të ketë nevojë për trajtime jashtë vendit në të ardhmen. /teve1.info/
