Serie A mund të jetë pranë një ndryshimi të madh në mënyrën si arbitrohen ndeshjet. Sipas “Il Messaggero”, AIA (inteligjenca artificiale) po studion seriozisht sistemin e ri Football Video Support (FVS), i cili aktualisht po testohet në Serie C dhe që mund të zëvendësojë plotësisht VAR-in tradicional.
Sistemi i ri ndryshon rrënjësisht nga ai që përdoret sot. Me FVS nuk do të ketë më një dhomë qendrore me gjyqtarë video në Lissone. Në vend të kësaj, pranë fushës vendoset një stacion i vogël ku punon një gjyqtar i pestë. Ky gjyqtar nuk jep mendim dhe nuk sugjeron vendime, ai thjesht i shfaq pamjet për arbitrin kryesor kur kërkohet rishikim.
Pjesa më revolucionare e sistemit është roli i trajnerëve. Me FVS, rishikimet nuk bëhen automatikisht, por vetëm kur trajnerët vendosin të kërkojnë sfidë. Çdo trajner do të ketë nga dy kërkesa për ndeshje, të cilat mund t’i përdorë për rastet e zakonshme: gola, penallti, kartonë të kuq direkt ose konfuzion mbi identitetin e lojtarit. Nëse trajneri ka të drejtë, ai e mban kartën e sfidës; nëse jo, e humbet.
Ky ndryshim do ta kthente përgjegjësinë te njerëzit në fushë, tek arbitrat dhe trajnerët, duke shmangur mbështetjen e tepruar te teknologjia dhe te specialistët në dhomën e VAR-it. Sipas AIA-s, loja do të rridhte më shpejt, me më pak ndalesa dhe me më pak polemika, pasi skuadrat vetë do të vendosnin kur ka vërtet nevojë për rishikim.
Nëse sistemi FVS funksionon mirë në Serie C, ai mund të jetë gati të hyjë edhe në Serie A në të ardhmen e afërt.
