Ushtria ruse ka bërë përparimin e saj më të madh në Ukrainë prej një viti në nëntor, tregoi një analizë e AFP-së e të dhënave nga Instituti për Studimin e Luftës (ISW) me seli në SHBA, citon The Guardian.
Gjatë muajit nëntor, Rusia pushtoi 701 kilometra katrorë, përparimi i dytë më i madh territorial i luftës pas atij të nëntorit 2024 – pa marrë parasysh muajt e parë të pushtimit kur vija e frontit ishte shumë e lëvizshme.
Deri në fund të nëntorit, ushtria ruse kontrollonte, plotësisht ose pjesërisht, 19.3 përqind të territorit ukrainas, sipas analizës së të dhënave nga ISW, e cila punon me Projektin e Kërcënimeve Kritike.
Ndërkohë, sulmet ruse ndaj Ukrainës kanë vazhduar gjersa zhvillohen bisedime të vazhdueshme për mundësinë e arritjes së një paqeje.
Një sulm rus gjatë natës në Dniepër në Ukrainën qendrore ka lënë të vrarë të paktën tre persona dhe ka plagosur të paktën një duzinë të tjerë, ka thënë guvernatori lokal, siç raportohet nga AFP.
“Të gjitha shërbimet e emergjencës po punojnë në vendin e sulmit me raketa në Dnipro. Aktualisht, raportohet se tre persona janë vrarë”, tha guvernatori rajonal i Dnipropetrovskit, Vladyslav Gaivanenko, në Telegram.
