Rrugën e morën drejt varrezave të fshatit Gllanasellë të Drenasit.
Kështu të dielën, qindra qytetarë u mblodhën në lagjen Topilla të këtij fshati.
Krejt kjo për t’i dhënë lamtumirën e fundit, Behar Topillës.
Ky i fundit ndërroi jetë të martën në Suedi, pas një sëmundje të rëndë.
Topilla ishte i mbijetuari i vetëm i masakrës së Shavarinës, ku forcat serbe vranë mbi 40 civilë shqiptarë.
Ceremonia fetare për varrimin e Behar Topilles, filloi në ora 13:00.
E për familjarët dhimbja e ndarjes nga më i dashuri i tyre, ishte e madhe.
Në emrin e tyre, Burim Beqiri, tha se Behar Topilla i tregoi botës se ushtria serbe, po udhëhiqte operacione shfarosëse ndaj shqiptarëve
“Behar, ti ishe dhe do mbetesh një dritë e gjallë. Një thirrje për drejtësi dhe nderim, zëri yt, historia dhe guximi yt do të jetojnë përtej kohës. Pusho në paqe o dëshmitar i rrugës së lirisë”, tha ai.
Me të pranishmit u ndanë edhe përjetimet e Topillës, kur ky i fundit si 19 vjeçar, i mbijetoi njërës nga masakrat më të rënda të luftës.
“Behari pas masakrës ku i shpëtoi vdekjes për një fije floku, arriti të tërhiqet deri tek në, tek pishat në mes fshatrave Çikatovë e Vjetër, Gllabarë, Shkabë dhe Verboc.Aty ishim të vendosura disa grupe të UCK-së. Behari aty mori ndihmën e parë”, tha Ferki Karaxha – komandant “Kompania”.
Ferki Karaxha nga batalioni i parë i Brigadës 114 “Fehmi Lladrovci” tha se UÇK arriti ta ruante dëshminë e Topillës.
“Më vonë nën përcjellje ushtarake, përshkroi rrugët e malit, rrugët e luftës derisa arriti në Maqedoninë e atëhershme. UCK këtë e bëri për ta ruajtur dëshmitarin e gjallë të njërës prej masakrave më të mëdha të bërë ndonjëherë nga krimet serbe”, tregoi ai.
Behar Topilla ndërroi jetë në moshën 45 vjeçare.
Ndërsa historia e tij u bë e njohur në botë përmes gazetës amerikane The Salt Lake Tribune, me titullin “I mbijetuari i vetëm”.
