Policia e Kosovës ka dhënë detaje për rastin e plagosjes me armë zjarri, i cili u regjistrua të shtunën në Fushë-Kosovë.
Sipas raportit 24-orësh, incidenti ka ndodhur në momentin kur viktima ishte ndalur pranë semaforëve, në zonën e kyçjes në rrugë.
Dyshohet se i dyshuari, i cili po drejtonte një veturë të tipit Audi A3, është irrituar pasi viktima nuk i kishte dhënë përparësi në trafik.
Ai ka dalë nga automjeti, e ka ofenduar verbalisht viktimën dhe më pas ka shtënë me armë zjarri në tokë ku plumbi ka devijuar dhe e ka goditur viktimën në këmbë.
Pas të shtënave, i dyshuari është larguar në drejtim të panjohur dhe ende nuk është kapur nga autoritetet.
Viktima ka marrë trajtim mjekësor, ndërsa në vendin e ngjarjes policia ka gjetur dhe konfiskuar një predhë dhe një gëzhojë.
Rasti është duke u hetuar.
“Është raportuar se derisa viktima m/k, ka qenë në semaforët për kyçje i dyshuari m/k për shkak që nuk i ka dhënë përparësi kalimi një i dyshuar mashkull ka dalur nga vetura e tipit Audi A 3 dhe duke e ofenduar verbalisht e ka shtënë me armë zjarri në tokë ku plumbi e ka goditur në këmbë. I dyshuari është larguar në drejtim të panjohur. Viktima ka pranuar tretman mjekësor ndërsa në vend ngjarje është gjetur dhe konfiskuar predha dhe gëzhoja. Rasti në ndodhet në procedurë hetimore”, thuhet në raportin e Policisë./teve1.info/
