Mallin për babain e saj i rënë dëshmor lufte, e ka çdo ditë.
Mirëpo në ditë festash, Valerina Halilaj thotë se atë e ndjen më shumë.
Ani pse nuk e ka njohur fare të atin, të jetë bijë e dëshmorit, Valerina thotë se është krenari.
“Sot në ditën e flamurit dhe të pavarësisë ndjej një krenari të veçantë që babi im dhe të gjithë dëshmorët dhanë jetën për këtë liri që ne sot e gëzojmë”, thotw ajo.
Për t’i nderuar të rënët në frontin e luftës, vizitorët në Gllogjan ishin nga të gjitha trojet. Në këtë ditë feste, Astrit Hasanaj, familjar i dëshmori tregon se nuk po bëhet mjaftueshëm për familjarët e dëshmorëve.
“Vij nga një familje dëshmori e babain e kam pas atdhetar prej ‘68 që ishte kundër Serbisë. Unë kam ardhur ekstra nga Zvicra për me i nderu të gjithë dëshmorët që janë ra ndër shekuj… Shteti nuk bën mjaftueshëm për dëshmorë, për arsye se dëshmorët janë të parët që është themeluar ky shtet dhe është ardhë liria jonë”, tha ai.
E jo vetëm nga Zvicra, vizitorë kishte edhe nga Franca.
Për të nderuar tre vëllezërit e tij dëshmorë, Osman Muslijaj pati një urim.
“Jam edhe pak i emocionuar, por rasti është i tillë e urime 28 nëntori, dashtë Zoti të bashkohemi e të na lirohen edhe ata burra të mëdhenj që i kemi në burgje”, tha ai.
Në Gllogjan, kujtesa e luftës lidhet ngushtë me Epopenë e Dukagjinit, sidomos me ngjarjet e 24 marsit 1998, kur forcat serbe rrethuan zonën dhe u përballën me rezistencën e luftëtarëve të UÇK-së.
