Tek Kompleksi Memorial “Adem Jashari” në Prekaz kanë bërë homazhe Organizatat e dala nga lufta e Ushtrisë Çlirimtare të Kosovës.
Kryetari i OVL-UÇK-së, Hysni Gucati, ka theksuar se festat e Nëntorit nuk mund të jenë të plota pa ish-krerët e UÇK-së, të cilët aktualisht gjenden në Hagë. Ai ka përmendur emrat e Hashim Thaçit, Kadri Veselit, Jakup Krasniqit dhe Rexhep Selimit, duke shprehur besimin se vitin e ardhshëm do t’i festojnë bashkërisht.
“Këto festa janë të mangët pa ish-krerët e UÇK-së, Hashim Thaçi, Kadri Veseli, Jakup Krasniqi e Rexhep Selimi, por shprehu besimin që ata do të kthehen dhe festën tjetër të nëntorit do ta festojnë bashkë me ta në Kosovë”, ka thënë Gucati
Gucati rikujtoi rëndësinë historike të katër ngjarjeve kryesore të nëntorit.
“Ju urojmë katër festat e nëntorit. Festa e vitit 1444 – ngritja e flamurit në Krujë nga Skënderbeu, shpallja e Pavarësisë së Shqipërisë më 1912, datëlindja e komandantit legjendar më 1955 dhe dalja në skenë e UÇK-së. Këto festa janë të mangëta sepse në i kemi krerët e UÇK-së në Hagë ku padrejtësisht po mbahen. Por shpresojmë dhe besojmë që vitin e ardhshëm do t’i presim këto festa bashkërisht me ta.”, është shprehur Gucati
Homazhet e organizuara nga OVL-UÇK-së në Prekaz vijnë si një mënyrë për të nderuar dëshmorët, heronjtë dhe luftëtarët e UÇK-së, duke ruajtur kujtimin e sakrificës së tyre dhe lidhjen me ngjarjet historike shqiptare.
