Anëtari më i ri i LDK-së, Ermal Sadiku, ka thënë se nuk ka pasur asnjëherë probleme me Lëvizjen Vetëvendosje dhe Albin Kurti.
Por, ai ka thënë se nuk pajtohet me politikat e kësaj partie.
Sadiku është shprehur se vendet si Kosova nuk mund të zhvillohen me ndihma.
“Me qeverisjen kam pakënaqësi, jo me z. Kurti si individë, s’kam pas asnjëherë. Unë kam qenë i pakënaqur me punën që është bërë. Mendoj që vendet si Kosova nuk mund të zhvillohen me politika social-demokrate, kjo është vetëm çështje e ideologjisë. Nuk mendoj që shteti zhvillohet duke dhënë ndihma”, ka thënë ai në emisionin “Këndi i Debatit” në Tëvë1.
Sadiku, i cili është sipërmarrës i teknologjisë në Kosovë, është pyetur në studio edhe për dixhitalizimin në arsim dhe shëndetësi, ku ka vlerësuar se në këto dy fusha ka dështime të mëdha.
“Ka mundur me u bë shumë më shumë dhe për këtë arsye jam unë këtu. Në arsim e shëndetësi ka pas dështime të mëdha që 26 vite. Nuk është diçka që mundem me mbrojte edhe me deshtë. I ke aty ktu disa aplikacione, por nuk ka kohezion. S’ka diçka që e lehtëson jetën e qytetarit”, tha ai.
