Zëvendësministri në detyrë i Drejtësisë nga radhët e LVV-së, Vigan Qorrolli, në emisionin “Këndi i Debatit” në Tëvë1 ka komentuar raportet e Lëvizjes Vetëvendosje me PDK-në dhe mundësinë e bashkëpunimit pas zgjedhjeve të ardhshme.
I pyetur nëse LVV-ja ka “vija të kuqe” ndaj PDK-së, Qorrolli tha se kjo është një pyetje më shumë mediale, duke kujtuar se edhe kryetari i ri i PDK-së, Bedri Hamza, ka deklaruar se “nuk ka vija të kuqe ndaj asnjë partie”.
“Në këtë legjislaturë që filloi dhe përfundoi, kemi thënë se përveç me PDK-në kemi qenë të gatshëm të bisedojmë dhe të bashkëpunojmë me të gjitha partitë e tjera. Kemi tentuar maksimalisht për dialog. Në zgjedhjet e ardhshme do të hyjmë të vetëm, së bashku me partnerët tanë si Lista Guxo dhe Alternativa. Mund të ketë edhe të tjerë, por nuk dua të përmend emra.”, tha Qorrolli.
Ai shtoi se çdo vendim për koalicione paszgjedhore u takon forumeve të partisë.
“Situata paszgjedhore vlerësohet kur të vijë koha. Nuk mund të them asgjë konkretisht tani. Vendimin përfundimtar e marrin forumet e partisë.”, u shpreh ai.
