Asociacioni i Gazetarëve të Kosovës, ka shprehur zhgënjimin e saj që në vendimin e Qeverisë së Kosovës për miratimin e kërkesës për kursime dhe ndarje nuk është përfshirë edhe ndarja e mjeteve për RTK-në.
Qeveria e Kosovës ka njoftuar këtë të martë, se ka miratuar kërkesën e Ministrisë së Financave, Punës dhe Transfereve për kursime dhe ndarje. Ky vendim në vlerë mbi 8 milionë euro vlen vetëm për Shërbimin Klinik Spitalor Universitar të Kosovës.
“AGK-ja shpreh zhgënjim të thellë që ky vendim nuk përfshin edhe Radio Televizionin e Kosovës, ashtu siç kishte premtuar një ditë më parë, Ministri në Detyrë i Financave, Hekuran Murati. Teksa jemi në fund të nëntorit, dhe 700 punonjësit e RTK-së ende presin pagën e tetorit, AGK-ja i bën thirrje urgjente Qeverisë së Kosovës që të gjejë formën ligjore për të ndarë buxhetin për RTK-në, për tre mujorin e fundit të 2025. Qeveria e Kosovës duhet të marrë parasysh urgjencën e zgjidhjes së problemit financiar të RTK-së, dhe rëndësinë e funksionimit të Transmetuesit Publik pa ndërprerje dhe pengesa”, thuhet në reagimin e AGK-së.
AGK ka theksuar se do të vazhdojë të solidarizohet me kolegët e RTK-së./teve1.info/
