Mesfushori i Kombëtares së Shqipërisë, Ernest Muçi, po vazhdon të tërheqë vëmendjen në kampionatin turk.
Edhe pse minutat në dispozicion nuk kanë qenë të shumta, ai po dëshmon se sa herë që i jepet mundësia, është në gjendje të bëjë diferencën në fushë.
Këtë javë, Muçi u aktivizua për vetëm 25 minuta, por mjaftuan që ai të shkëlqente dhe të fitonte vendin në formacionin më të mirë të javës në Superligën turke.
Ndeshja mes Trabzonsporit dhe Basaksehirit, e vlefshme për javën e 13-të të kampionatit, u kthye në një thriller të vërtetë, e cila u mbyll me rezultatin dramatik 3–4.
Muçi hyri në lojë si zëvendësim i paplanifikuar, pas dëmtimit të Jabol-Folkarelit, por momenti i tij erdhi menjëherë.
Mesfushori kuqezi shënoi dy gola vendimtarë, duke kthyer ndeshjen në favor të Trabzonsporit dhe duke qenë protagonist absolut në rikthimin spektakolar.
Sipas platformës së specializuar Sofascore, Muçi mori notën 9, një prej më të lartave të javës, duke siguruar edhe përfshirjen në Formacionin e Javës.
Përveç Muçit edhe Juljan Shehu është vlerësuar në kampionatin polak, duke u përfshirë po ashtu në formacionin e javës.
