Sulmuesi i skuadrës së Llapit, Muhamet Hyseni ka fituar epitetin e futbollistit më të mirë për xhiron e 14-të, në Superligën e Kosovës në futboll.
Federata e Futbollit të Kosovës (FFK), ka njoftuar të hënën, se Hyseni është shpallur “Ylli i Javës”, çmim ky që ndahet pas përfundimit të secilës xhiro për lojtarin më të mirë.
Komisioni i Veteranëve të futboll, që e bën përzgjedhjen, ka konfirmuar Hysenin si më të mirin pas paraqitjes fantastike që e pati në derbin Ballkani – Llapi.
Llapi triumfoi në Suharekë me rezultat 4:2, ndërsa Hyseni shënoi dy gola dhe bëri një asistim për këtë fitore të rëndësishme të ekipit të tij.
Me të marrë çmimin, Hyseni është shprehur tejet i lumtur për vlerësimin, ndërsa ka shtuar se shpreson të vazhdojë me shënimin e golave për ta ndihmuar ekipin e tij.
Gjithashtu, Hyseni ka thënë se po ndihet shumë mirë që është rikthyer në Superligë dhe pret që me Llapin të arrijë synimin e këtij sezoni, përfundimin në pjesën e epërme të tabelës.
