Istref Elshani, banorë i këtij fshati thotë se detyrohet që për çdo ditë të udhëtojë dhjetëra kilometra për të siguruar ujë të pijshëm për familje.
E hallet e njëjta me Elshanin i kanë edhe banorët e tjerë në këtë fshat.
Arben Haziraj që është edhe kryetar i fshatit ka shpresë që ky problem të zgjidhet.
‘Problemi për ujë të pijshëm në fshatin Krajkovë do të zgjidhet, për arsye se kemi premtime shumë të mëdha prej kryetarit, por ky problem nuk është vetëm sot, por ky problem është i kahershëm, është problem pronësor, nuk është problem që s’ka ujë por problem pronësor, por problemi pronësor me sa kam njohuri unë është zgjidh, edhe tash pritet vetëm me u finalizu projekti edhe asgjë tjetër’’, thotë ai.
Ndërkaq nga Komuna e Drenasit, fajin për këtë ia hedhin kompanisë rajonale të ujësjellësit “Prishtina”.
“Edhe në qeverisjen Lladrovci, në mungesë të dokumentacioneve të shpronësimit, është shpallur me interes të përgjithshëm dhe është bërë shpronësimi i asaj parcele për t’u bërë zgjidhje banorëve me ujë të pijshëm, por kompania e ujësjellësit “Prishtina” njësia në Drenas, është e papërgjegjshme dhe nuk e ka mirëmbajte këtë burim të ujit për pije, sikurse edhe burimet tjera në fshatin Arllat, Kizhnarekë, Gjergjicë dhe vende të tjera’’, ka thënë Bekim Dobra- zëdhënës në Komunën e Drenasit
Ndërsa, në Ujësjellësin ‘Prishtina’ dega në Drenas, thonë se kjo çështje nuk është nën menaxhimin e tyre.
‘’Më pas me ardhjen e Feronikelit, Drenasi ka filluar të e merr ujin nga burimi që tash e ka. Banorët e Krajkovës më pas kanë dashur që të furnizohen nga ato burime natyrore që janë në fshatin e tyre dhe gjithçka ta menaxhojnë vet. Poashtu në vitin 2015 ka qenë një projekt i CDI-së për ta futur në sistem të ujësjellësit edhe këtë fshat, por ata nuk kanë lejuar dhe në atë kohë dëshira e tyre ka qenë që ta menaxhojnë vet furnizimin me ujë prej atyre burimeve natyrore”
Kronika e realizuar nga Furtuna Zejnullahu
