Rreth orës 05:40 të mëngjesit të sotëm, njësitë e Policisë së Kosovës janë njoftuar për një zjarr që kishte shpërthyer në katin e tetë të një soliteri në rrugën “Bill Klinton” në Pejë.
Lajmin për Tëvë1 e ka konfirmuar zëdhënësi i Policisë për Rajonin e Pejës, Fadil Gashi.
“Menjëherë policia dhe zjarrfikësit kanë dalë në vend të ngjarjes. Qytetarët, për shkak të tymit të madh, fillimisht janë kapluar nga paniku, mirëpo pas një kohe ekipet zjarrfikëse kanë arritur ta shuajnë zjarrin”, tha Gashi.
Ai njoftoi se disa banorë të kateve të sipërme janë evakuuar përkohësisht për shkak të tymit, por fatmirësisht nuk ka persona të lënduar.
“Sot rreth orës 05:40, policia është njoftuar se në një banesë në katin e tetë të një ndërtese shumëkatëshe ka shpërthyer zjarr. Në vendngjarje kanë dalë policia, zjarrfikësit dhe ekipi mjekësor. Janë evakuuar disa banorë, pasi tymi kishte depërtuar në katet e sipërme. Zjarri është lokalizuar dhe nuk ka të lënduar. Në vendngjarje qëndrojnë njësitë kompetente policore”, tha ai në përgjigjen me shkrim.
Sipas autoriteteve, zjarri është shuar plotësisht dhe situata është stabilizuar.
