Ministri në detyrë i Financave, Hekuran Murati, ka reaguar ndaj deklaratave të deputetit të PDK-së, Përparim Gruda, i cili tha se seanca e jashtëzakonshme e cila është duke u mbajtur, është jokushtetuese.
Murati i ka quajtur këto pretendime të pavërteta.
Sipas tij, deputeti Gruda është i vetëdijshëm se një ndalesë e tillë nuk ekziston në Kushtetutë apo rregullore.
“Gruda e di shumë mirë që kjo nuk qëndron. Nuk është e shkruar askund një gjë e tillë. Ai iu referua praktikave, por ato bëhen duke i zbatuar në praktikë. Kjo është praktikë që po formohet tash. Kemi një situatë të jashtëzakonshme dhe mund të shfrytëzohet si e tillë”, tha Murati në Kuvend.
Ai shtoi se deputeti Gruda po bën deklarata të pavërteta edhe për çështjen e komisioneve parlamentare, duke theksuar se vetëm dy prej tyre janë të obliguara të udhëhiqen nga opozita.
“Gruda është në siklet, sepse edhe si jurist po i nevojitet të thotë të pavërteta. U tha që komisionet nuk mund të formohen pa ditur kush është në opozitë dhe kush pozitë – edhe kjo një e pavërtetë. Kjo vlen vetëm për dy komisione: atë për AKI-në dhe atë për mbikëqyrjen e financave publike”, tha Murati.
Seanca e jashtëzakonshme po vazhdon me debate mes Grudës dhe deputetëve të VV-së rreth legjitimitetit të seancës. /teve1.info/
