Ministri në detyrë i Financave, Hekuran Murati, i ka reaguar kryetarit të Prishtinës, Përparim Rama, pasi ky i fundit sot më 18 nëntor iu drejtua sërish Gjykatës Kushtetuese me një kërkesë urgjente për çështjen e buxhetit të kryeqytetit.
Në reagimin e tij, Murati ka përsëritur qëndrimin se bllokimi i buxhetit të Prishtinës mund të zgjidhet vetëm nëse Lidhja Demokratike e Kosovës, partia e Ramës, e voton atë në Kuvend.
“Përparim Rama e ka shumë të lehtë që ta bëjë zgjidhjen për buxhetin e Komunës së Prishtinës – le t’i kërkojë Lumir Abdixhikut që ta votojnë në Kuvend, dhe buxheti i Prishtinës bëhet pjesë e Ligjit të Buxhetit 2025. Kaq e thjeshtë është”, ka shkruar Murati.
Ai ka akuzuar LDK-në se po e mban peng buxhetin e kryeqytetit për shkak të, siç tha, “rivalitetit të brendshëm”, duke shtuar se nga kjo po dëmtohen qytetarët.
“Siç duket, shtimi i zërave se tash edhe Lumir Abdixhiku duhet të japë dorëheqje dhe në vend të tij në krye të LDK-së duhet të vijë Përparim Rama, ka filluar të prodhojë efektet e para në LDK. Ndryshe nuk ka se si spjegohet qëndrimi kategorik i grupit parlamentar të LDK-së për të mos e miratuar Buxhetin 2025 për Komunën e Prishtinës, kur tashmë janë me miliona euro fatura të papaguara që janë mbledhur në mungesë të buxhetit të miratuar, dhe ka mbetur pak më shumë se 1 muaj deri në fund të vitit fiskal. Shumë keq që për shkak të rivalitetit të brendshëm në LDK, po e pësojnë qytetarët e Prishtinës”, ka përfunduar Murati.
