Kryetari i Partisë Demokratike të Kosovës, Memli Krasniqi thotë se Kosova 23 vite më parë i dha fund robërisë e vuajtjeve shekullore dhe i hapi rrugën ndërtimit e zhvillimit të vendit, shkruan teve1.info.
“Në këtë rrugëtim, u jemi falënderues përjetësisht miqve që na dolën krah, NATO-s e SHBA-ve dhe shteteve të tjera demokratike. Por, posaçërisht sot, përkulemi para sakrificës së shumë brezave të dëshmorëve, martirëve, të burgosurve, veprimtarëve e intelektualëve shqiptarë, që u angazhuan ditë e natë për këtë ditë. Nderojmë me respektin e përjetshëm luftën e drejtë të Ushtrisë Çlirimtare të Kosovës, heronjve tanë, që Kosovën e kishin më të shtrenjtën”, tha Krasniqi.
I pari i PDK-së përmes një postimi në Facebook u ka uruar Ditën e Çlimimit edhe themeluesve të UÇK-së që gjenden në Hagë.
“Sot, këtë ditë të bekuar, ua urojmë edhe themeluesve të UÇK-së, Hashim Thaçit e Kadri Veselit, Jakup Krasniqit e Rexhep Selimit dhe çlirimtarëve të tjerë, të cilët padrejtësisht sot nuk janë pranë nesh”, ka shkruar Krasnqi.
Ndërsa Kryetari i Aleancës për Ardhmërinë e Kosovës, Ramush Haradinaj uroj këtë ditë duke thënë se e shenjtë është dita e lirisë së Kosovës.
“Falë gjakut të Dëshmorëve, vendosmërisë e trimërisë së luftëtarëve të UÇK-së, intervenimit të NATO-s, sot jemi pjesë e botës së lirë!Amaneti i atyre që ranë për lirinë që e gëzojmë sot, na obligon ta ruajmë të plotë e ta zhvillojmë Kosovën”, ka shkruar Haradinaj në Facebook.
