Organizata e Veteranëve të Luftës së Ushtrisë Çlirimtare të Kosovës do të zhvillojë sot një protestë para Asamblesë Parlamentare të Këshillit të Evropës, duke kërkuar lirimin e ish-krerëve të UÇK-së.
Protesta pritet të nisë në orën 13:00, dhe sipas OVL-UÇK-së, në të do të marrin pjesë mijëra qytetarë, përfshirë shumë nga mërgata kosovare.
“Jemi të gatshëm për fillimin e protestës, sepse janë bërë të gjitha përgatitjet e nevojshme. Në protestë pritet të marrin pjesë shumë njerëz nga mërgata jonë”, tha Gazmend Syla nga OVL-UÇK.
Për këtë organizim janë përgatitur edhe 285 letra që do t’u dërgohen anëtarëve të Asamblesë së Këshillit të Evropës.
“Këto letra përmbajnë shqetësimet tona për padrejtësitë ndaj krerëve të UÇK-së. Besojmë se me këto protesta, në Prishtinë, Tiranë dhe tani në Strasburg, kemi arritur të ngremë zërin e popullit dhe t’i dërgojmë mesazhin: ‘Jo në emrin tim’”, shtoi Syla.
Kjo është protesta e katërt pas atyre të zhvilluara në Hagë, Prishtinë dhe Tiranë.
Më 5 nëntor shënohen pesë vjet nga arrestimi i ish-krerëve të UÇK-së: Hashim Thaçi, Kadri Veseli, Jakup Krasniqi dhe Rexhep Selimi.
Organizatat e dala nga lufta e UÇK-së kanë deklaruar se ata po përballen me padrejtësi dhe nuk do të dorëzohen.
