Politologu, Avdi Smajljaj ka vlerësuar se partitë politike ish-opozitare do të kenë shumë vështirësi për të sfiduar Lëvizjen Vetëvendosje nëse nuk realizojnë reforma të thella brenda partive të tyre.
Në emisionin “Këndi i Debatit” në Tëvë1, Smajljaj ka theksuar se ndryshimi i kryetarit të partisë nuk është i mjaftueshëm për të sfiduar LVV-në.
Sipas tij, për të pasur mundësinë për të sfiduar Vetëvendosjen partitë ish-opozitare duhet të kalojnë nëpër një proces të thellë reformimi, që përfshin ndryshime në strukturën organizative dhe statutin e partive.
“Unë mendoj që, jo vetëm te PDK-ja, por edhe te partitë tjera ish-opozitare, ndërrimi i kryetarit nuk mjafton. Këto parti janë shumë të sfiduara nga Vetëvendosja, dhe besoj që kjo sfidë iu ka bërë mirë. Duhet të reformohen brenda, të shikohet statuti organizativ dhe të përcaktohet çfarë duhet ndryshuar. Po ashtu, duhet të rritet angazhimi për prurjet e reja dhe ndryshimet në kuadrot që kanë qenë deputetë nga legjislatura e parë. Duhet një reformë e brendshme e thellë, jo vetëm në PDK, por në afatgjatë. Nëse nuk bëhet një reformë e tillë, opozita ka shumë vështirësi për të dalë përpara Vetëvendosjes. Nëse LVV-ja bie për shkak të mos përmbushjes së premtimeve, atëherë mund të shfrytëzohet kjo mundësi, por përndryshe, në mungesë të reformave, është shumë e vështirë. Ndryshimi i kryetarit është i pamjaftueshëm”, ka thënë Smajljaj.
