Kryetari i Kuvendit të Kosovës, Dimal Basha, në një takim të mbajtur sot, mirëpriti Drejtorin e Institutit të Krimeve të Kryera gjatë Luftës në Kosovë, Atdhe Hetemi, i cili prezantoi raportin e punës për periudhën 8 nëntor 2024 – 9 nëntor 2025.
Në këtë takim, u diskutua për rëndësinë e punës që ky institut ka kryer në dokumentimin dhe ruajtjen e kujtesës historike të Kosovës, duke theksuar kontributin e tij në ndriçimin e krimeve të luftës që kanë ndodhur gjatë periudhës së Luftës së Kosovës.
Basha shprehu mirënjohjen e tij për përkushtimin e Drejtorit Hetemi dhe stafit të Institutit, duke theksuar se dokumentimi i krimeve të luftës është një hap i rëndësishëm drejt drejtësisë për viktimat e gjenocidit të Serbisë.
Ai theksoi se ky institucion ka një rol kyç në sigurimin e provave për ndëshkimin e kriminelëve të luftës dhe ruajtjen e kujtesës historike për brezat e ardhshëm.
“Dokumentimi i krimeve të luftës, dëbimeve, dhunimeve e masakrave është akt i kujtesës në shërbim të drejtësisë. Si shtet dhe si shoqëri, kemi detyrim moral e institucional ta mbështesim këtë punë, për të mos lejuar që e kaluara të zbehet dhe për të kërkuar drejtësi për çdo krim të kryer në Kosovë”, thaBasha.
“Instituti, i themeluar në nëntor 2023, është bërë qendër e hulumtimit, dokumentimit dhe përpunimit të materialeve mbi krimet që regjimi serb i Millosheviqit kreu ndaj popullit tonë, si dhe i veprimeve dhe ngjarjeve që kanë dërguar te lufta në Kosovë, me qëllim të paraqitjes së plotë të fakteve dhe kontekstit historik”, theksohet në njoftimin e Kuvendit të Kosovës./teve1.info/
