Komisioni Qendror i Zgjedhjeve (KQZ) ka miratuar rekomandimin për themelimin e Komisionit për vlerësimin e fletëvotimeve dhe përputhjes së numrit të tyre në vendvotime për zgjedhjet e rundit të dytë për kryetar komune.
Kjo është bërë në mbledhjen e mbajtur të enjten.
“Sipas vendimit të KQZ-së, Komisioni do të bëjë vlerësimin dhe verifikimin e fletëvotimeve dhe përputhjes së tyre në Qendrën e Numërimit dhe Rezultateve, pas pranimit nga Komisionet Komunale të Zgjedhjeve”, thuhet në komunikatën e KQZ-së.
Po ashtu, puna e këtij komisioni do të jetë në funksion të përgjigjes për Panelin Zgjedhor për Ankesa dhe Parashtresa pas ankesës së parashtruar në këtë institucion lidhur me zgjedhjet e raundit të dytë për Kryetar të Komunës në Mitrovicën e Jugut.
Në fillim të mbledhjes, kryesuesi Radoniqi njoftoi se gjatë ditës, KQZ ka pranuar edhe një raport nga kompania që ka shtypur fletëvotimet për të gjitha komunat që i kanë pranuar dhe i saktësojnë të gjitha gabimet në të gjitha dengjet e fletëvotimeve të printuara, ku rezulton se në këto dengje janë votat e fundit apo dy votat e fundit, që kanë pasur numra të vendvotimeve të ndryshme, por edhe disa prej tyre të zbrazëta.
