Një incident ka ndodhur sot gjatë mesditës në rrugën “Nënë Tereza”, afër “Tregut të gjelbër” në Istog, ku një person ka tentuar t’i ikë patrullës policore.
Gjatë ndërhyrjes për arrestimin e tij, një zyrtar policor ka pësuar lëndime
Lajmin e ka konfirmuar për tëvë1.info zëdhënësi i Policisë së Kosovës për rajonin e Pejës, Fadil Gashi, i cili ka dhënë detaje mbi rastin.
“Rreth orës 13:15 patrulla policore e cila ishte e angazhuar në implementim të planit operativ në rrugën ‘Nënë Tereza’, saktësisht ‘Te tregu i gjelbër’, ka vërejtur në një veturë dy persona brenda saj. Janë afruar dhe me të arritur kanë kërkuar që të dyshuarit të dalin nga vetura. Në atë moment i dyshuari i ulur në ulësen e pasagjerit ka dal nga vetura dhe është nisur me vrap për tu arratisur”, tha ai.
Sipas Gashit, gjatë tentimit për t’u larguar, i dyshuari ka nxjerrë armën në drejtim të policisë, ndërsa zyrtarët kanë reaguar duke përdorur komandën verbale ‘Ndalo’.
“Pasi zyrtarët policorë kanë arritur ta kapin të dyshuarin gjatë arrestimit një zyrtarë ka pësuar lëndime të lehta dhe aktualisht është duke marrë trajtim mjekësor”, ka shtuar Gashi tutje.
Zëdhënësi bëri të ditur se të dy personat e përfshirë në rast janë shoqëruar në stacion policor për procedura të mëtejshme./teve1.info/
