Anëtarja e LDK-së, Besa Gaxherri ka komentuar rezultatet e zgjedhjeve lokale, duke theksuar se në disa komuna është vërejtur ndikimi i qartë nga ana e Qeverisë.
“Natyrisht që është një rezultat deri diku i pritshëm, por tashmë kemi dy komuna për të cilat duhet theksuar se nuk janë më siç kanë qenë – Fushë-Kosova dhe Obiliqi. Në këto dy komuna është bërë një inxhinieri e madhe nga Qeveria në detyrë. Më vjen keq për qytetarët e këtyre dy komunave, pasi jo gjithmonë vota vlerëson njerëzit që kanë autoritet, siç ishin kandidatët tanë,” ka deklaruar Gaxherri në emisionin “Ditari” në Tëvë1.
Ajo ka folur edhe për garën në Mitrovicë, të cilën e ka cilësuar si mjaft të ngushtë dhe me dyshime rreth rezultatit përfundimtar.
“Në Mitrovicë ka qenë një garë shumë interesante. E gjithë Qeveria në detyrë është angazhuar në mbështetje të kandidatit të saj, z. Tahiri, i cili për qytetarët e Kosovës ishte fytyrë e panjohur. Megjithatë, nuk ka qenë e lehtë as për kandidatin e PDK-së. Edhe mua më lindën dyshime kur të gjitha exit-pollet e nxorën fitues Tahirin, por rezultati doli ndryshe dhe nisën dyshimet për numërimin,” ka shtuar ajo.
Madje, Gaxherri shpreson që dyshimet për manipulime në Mitrovicë të Jugut të mos rezultojnë të vërteta.
“Uroj që këto dyshime të mos jenë të sakta, sepse do t’i prishej imazhi procesit zgjedhor në Kosovë. Jemi dëshmitarë që i gjithë kabineti në detyrë i Qeverisë ka luajtur një lojë shumë të pandershme në të gjitha komunat,” ka thënë ajo./teve1.info/
