Deputeti i Partisë Demokratike të Kosovës (PDK), Artan Behrami, ka publikuar sot pamje të reja që, sipas tij, tregojnë parregullsi serioze në procesin zgjedhor në Mitrovicë.
Në një video të shpërndarë në rrjetin social Facebook, ai ka theksuar se bëhet fjalë për fletëvotime të dyshimta, ku disa prej tyre shihen pa vulë zyrtare.
Behrami ka ngritur dyshime se bëhet fjalë për një manipulim të organizuar dhe jo për raste të izoluara.
Ai ka akuzuar pushtetin aktual për, siç thotë, “inxhinieri shtetërore” me qëllim të deformimit të rezultatit të zgjedhjeve.
“Keqpërdorimi është aq masiv, saqë ky nuk është as tren bullgar. Ky është inxhiniering shtetëror i Albin Kurtit. Aq shumë fletë pa vulë, me numra të çrregullt serikë, saqë këtu nuk bëhet fjalë për një grusht fletëvotimesh. Këtu bëhet fjalë për dengje fletëvotimesh që kanë qenë në duart e njerëzve të VV-së përpara se të fillonte procesi zgjedhor”, shkroi ai në Facebook.
Ai ka bërë thirrje që institucionet përgjegjëse, përfshirë Komisionin Qendror të Zgjedhjeve (KQZ) dhe Prokurorinë, të hetojnë me urgjencë rastin për të garantuar integritetin e procesit dhe mbrojtjen e votës së qytetarëve.
Ndryshe, Partia Demokratike e Kosovës tashmë ka paralajmëruar dorëzimin e një ankese zyrtare në Panelin Zgjedhor për Ankesa dhe Parashtresa (PZAP) lidhur me parregullsitë që pretendon se kanë ndodhur në Mitrovicë gjatë ditës së zgjedhjeve. /teve1.info/
