Në Gjakovë dhe Mitrovicë të Jugut ka pasur ankesa nga qytetarët që nuk u është lejuar të asistojnë të afërm të tyre për të votuar.
Në Gjakovë një grua tha se nëna se saj nuk mund të votonte pa asistencë për shkak të gjendjes shëndetësore.
Por nga punëtorët e KQZ-së u tha se ajo duhet të ketë dëshmi mjekësore për të.
Çka thotë udhëzuesi për votimin me asistencë:
Votimi me asistencë lejohet vetëm në raste të justifikuara, kur votuesi nuk është në gjendje për të votuar, hedhë fletën e votimit për shkak të pengesave fizike ose vështirësive të kufizuara.
Votuesi që kërkon ndihmë gjatë votimit duhet të përmbushë kushtet e mëposhtme:
Deklaron para Këshillit të Vendvotimit arsyen pse kërkon të votojë me asistencë;
Paraqet dokument zyrtar mjekësor që vërteton paaftësinë për të votuar vetë, të lëshuar nga institucioni përkatës shëndetësor;
Dokumenti duhet të përmbajë numrin rendor ose numrin e protokollit.
Votuesi identifikohet me dokument të vlefshëm identifikimi të Republikës së Kosovës si:
Letërnjoftim i vlefshëm,
Pasaportë, ose
Patentë shoferi.
Këshilli i Vendvotimit është i obliguar të verifikojë dokumentet e paraqitura dhe të sigurohet që votimi me asistencë të lejohet vetëm në përputhje me kriteret ligjore dhe rregullat zgjedhore.
