Fillimisht u ndanë nga pjesa tjetër e familjes.
E në këtë formë (me duar pas koke), burrat u sollën në oborrin e shkollës së vjetër të fshatit.
E gjithë ngjarja ndodhi në shtatorin e vitit 1998 në fshatin Panorc të Malishevës.
Para tyre me armë të gjatë, qëndronin forcat policore serbe.
Në rreshtin e parë, ndodhej edhe Asllan Bajrami nga ky fshat.
As 27 vite, nuk mjaftuan që profesori i Kimisë, t’i harrojë përjetimet e kësaj dite të rëndë.
“Kur filloi më u bë errësirë, na sollën këtu të shkolla dhe na bën bashkë me grupin që ishte në fshat. Na thanë gjithçka që i keni në xhepa duhet t’i largoni dhe na vendosen në klasa ku nuk kishte vend me u ulë. Aty, përveç ushtarëve, kanë qenë policët, paramiliatarët në mesin e tyre kishte edhe rusë, pasi që personalisht i kam dëgjuar duke folur rusisht”, tregoi Asllan Bajrami.
Brenda objektit të shkollës së vjetër, shqiptarët u mbajtën tërë natën.
Të nesërmen, këta u nxorën dhe u rreshtuan.
“Na kanë detyruar duart me i qitë mas qafës, në ishim në klasën e fundit, por kur na nxorën jashtë, neve na ra me qenë në rreshtin e parë… Në ato momente kemi menduar se do të digjemi bashkë me shkollën. Ishin momente emocionuese. Kur kanë filluar fëmija me na sjellë ushqime, kanë qenë një ndër emocionet më të rënda”.
Për në Panorc të Malishevës, ishte nisur një mision i huaj diplomatik.
Kjo bëri që shqiptarët e arrestuar t’i shpëtojnë më të keqes.
Por, shumë prej tyre nuk i shpëtuan torturave e maltretimeve serbe.
“Shipka në të cilën ka pasur gozhda, kabëll, dru më të cilët i kanë rrahur njerëzit të cilët donin. Policia serbe dhe paramilitarët”.
Por, as taktika e ushtarëve të UCK-së, nuk e largoi vëmendjen e forcave serbe nga popullata civile.
“Kuptohet ne jemi munduar me rezistua, mirëpo erdhi urdhri nga shtabi që mos ta rrezikojmë popullatën. Ne nuk kishim mundësi ta ndalnin ofanziven për shkak se nuk kishim armatim mjaftueshëm dhe ushtarët ishin shumica nxënës të mi. Teksa u tërhoqëm gjuajtëm disa herë që forcat serbe të orientohen pas neve e mos ta dëmtojnë popullatën”, tha ish-komandanti i UÇK-së, Ahmet Rexha.
27 vite pas kësaj ngjarje, Sërgjan Lazoviq, e gjeti veten na bankën e të akuzuarit për krime lufte në Kosovë.
Ky i fundit shihet në këtë foto, teksa parakalon para shqiptarëve të ndaluar me dhunë.
