Politiologia Arta Tahiri-Beqa ka komentuar zhvillimet e fundit politike në vend, duke vlerësuar se të gjitha partitë politike janë bërë pengesë për funksionimin normal të Kuvendit të Kosovës dhe krijimin e bashkëpunimeve për institucionet.
Ajo tha se të gjitha partitë janë bllokuese, pasi që për tetë muaj pas zgjedhjeve nacionale, nuk kanë treguar vullnet për bashkëpunim ose marrëveshje.
Tahiri-Beqa kritikoi edhe Lëvizjen Vetëvendosje, duke e cilësuar si parti me qasje populiste.
“Do të doja që ndëshkues të jenë të gjitha partitë. Bllokues janë të gjithë. Që tetë muaj janë bllokues. Asnjëra parti nuk ka pasur vullnet për të bashkëpunuar për të pasur marrëveshje, koalicion. I pari i partisë, që i fitoi këto zgjedhje, pra VV-së, narrativa e saj që gjithmonë një moto – gjithmonë e merr një moto që e ngulit në kokën e qytetarëve, ku thotë se kjo ka ndodhë dhe unë duka mbështetjen e juve, por tek e fundit edhe është parti populiste, sepse edhe me kësi populizma ka arritur edhe në pushtet”, deklaroi ajo në emisionin “Këndi i Debatit” në Tëvë1.
Ajo shtoi se LDK-ja është partia më bllokuese, pasi që iu është përgjigjur ftesës së VV-së negativisht.
“Është e vërtetë, të vetmit që mund t’i quajmë bllokues janë LDK-ja, e cila iu përgjigj negativisht ftesës së VV-së, edhe pse në sytë e mi nuk ka qenë ftesë korrekte. Por, s’mund ta quash bllokuese PDK-në, kur nuk i është bërë ftesë, as AAK-në apo Nismën, kur VV-ja nuk kërkoi formë bashkëpunimi”, theksoi ajo. /teve1.info/
