Policia e Kosovës ka arrestuar sot në mëngjes personin e dyshuar për vrasjen e dyfishtë që ndodhi dje në fshatin Golluboc të Malishevës, ku dy vëllezër u qëlluan për vdekje nga dhëndri i tyre.
Sipas njoftimit të Prokurorisë Themelore në Gjakovë, i dyshuari A.I., i cili që nga momenti i ngjarjes kishte qenë në arrati, është kapur nga policia në orët e para të ditës së sotme.
“Prokuroria Themelore në Gjakovë njofton opinionin publik se, lidhur me rastin e vrasjes së dyfishtë të ndodhur në fshatin Golluboc, komuna e Malishevës, është arrestuar personi i dyshuar A.I., i cili më parë kishte qenë në arrati. Lidhur me rastin, Policia e Kosovës, në koordinim të plotë me Prokurorin e Shtetit, është duke ndërmarrë të gjitha veprimet e nevojshme,” – thuhet në njoftimin zyrtar të Prokurorisë.
Në njoftim po ashtu bëhet e ditur se brenda afatit ligjor do të dorëzohet kërkesa për caktimin e masës së paraburgimit ndaj të dyshuarit në Gjykatën kompetente.
Lajmin për arrestimin e ka konfirmuar edhe drejtori i Drejtorisë Rajonale të Policisë në Gjakovë, Lumni Graishta, i cili tha për Tëvë1 se i dyshuari është arrestuar në orën 06:30 të mëngjesit.
“Po, i dyshuari për vrasjen e dyfishtë në Golluboc është arrestuar sot në orën 06:30,” – deklaroi Graishta për Tëvë1.
Sipas burimeve të Tëvë1, i dyshuari është i plagosur dhe është dërguar për trajtim mjekësor. Plagosja dyshohet se ka ndodhur gjatë ballafaqimit me dy viktimat, moment para se të kryhej krimi.
Policia dhe Prokuroria po vazhdojnë hetimet për të sqaruar të gjitha rrethanat e kësaj ngjarjeje tragjike që tronditi komunitetin e Malishevës.
