Kandidati i Lëvizjes Vetëvendosje për kryetar të Prishtinës, Hajrulla Çeku ka vizituar për herë të dytë brenda pak javësh tregun e shitjes me shumicë në kryeqytet, duke theksuar mungesën e investimeve komunale në këtë hapësirë gjatë katër viteve të fundit.
Ai tha se komuna do të ndërmarrë masa të menjëhershme për të siguruar kushte normale pune dhe infrastrukturë të përshtatshme që do të mundësojë zhvillimin e bizneseve dhe krijimin e një ambienti të favorshëm për tregti.
“Pa humbur aspak kohë, do të sigurohemi që ky treg të ketë kushte normale të funksionimit, infrastrukturë adekuate që mundëson zhvillimin e mëtutjeshëm të bizneseve dhe një ambient të përshtatshëm për tregti. Zhvillimi i bizneseve sjell përfitime për të gjithë sepse ngrit standardin e jetesës dhe zvogëlon papunësinë, andaj, ne do t’i qëndrojmë afër dhe do t’i mbështesim të gjithë ata që duan punën dhe synojnë zhvillimin”, ka shkruar ai në Facebook.
Çeku shtoi se përkushtimi i Komunës do të jetë për një Prishtinë të zhvilluar dhe të barabartë, ku çdo biznes ka mundësi të kontribuojë në mirëqenien e qytetarëve.
