Në pesëvjetorin e arrestimit të ish-udhëheqësve të Ushtrisë Çlirimtare të Kosovës – Hashim Thaçi, Kadri Veseli, Jakup Krasniqi dhe Rexhep Selimi – deputeti i PDK-së, Enver Hoxhaj, ka reaguar duke vlerësuar qëndrueshmërinë e tyre si simbol të sakrificës dhe përkushtimit ndaj Kosovës.
Hoxhaj ka theksuar se periudha e gjatë e paraburgimit në Hagë është padrejtësi historike që, sipas tij, do të kthehet në forcë dhe drejtësi për UÇK-në dhe shtetin e Kosovës.
“Pesë vjet pas arrestimit të Hashim Thaçit, Kadri Veselit, Jakup Krasniqit dhe Rexhep Selimit, qëndresa e tyre mbetet dëshmi e sakrificës, vetmohimit dhe dashurisë për atdheun. Padrejtësinë do ta kthejmë në forcë dhe drejtësi për UÇK-në dhe për Kosovën. Falë popullit tonë dhe aleatëve tanë, historia e fitores mbetet e patjetërësuar”, ka shkruar ai në një postim në Facebook.
Hoxhaj gjithashtu ka nënvizuar rëndësinë e ruajtjes së kujtesës për kontributin e luftëtarëve të UÇK-së, duke thënë se përkushtimi i tyre ndaj lirisë mbetet pjesë thelbësore e identitetit dhe historisë së Kosovës. /teve1.info/
