Deputetja e Lëvizjes Vetëvendosje, Fitore Pacolli, ka thënë se mosvotimi i Glauk Konjufcës për kryeministër nga partitë opozitare do të tregojë se ato kanë problem me LVV-në në përgjithësi.
Në një intervistë për emisionin “Info Nata” në Tëvë1, Pacolli ka theksuar se LVV do të tregojë gjithashtu se opozita nuk është e gatshme të nxjerrë Kosovën nga situata e pafavorshme ku ndodhet aktualisht.
“Tani, nëse kanë problem edhe me Glauk Konjufcën, atëherë ata kanë problem me Lëvizjen Vetëvendosje në përgjithësi dhe nuk janë të gatshëm të dalim nga kjo situatë e pafavorshme për shtetin e Kosovës. Na duhet buxheti, nuk mund të shkojmë në zgjedhje të reja pa e pasur buxhetin e miratuar,” tha ajo.
Pacolli ka komentuar edhe deklaratën e kryetarit të Lidhjes Demokratike të Kosovës, Lumir Abdixhiku, i cili e konsideroi vendimin e LVV-së si një veprim politik propagandues dhe blerje kohe pa efekt real politik.
Sipas deputetes Pacolli deklaratat e Abdixhikut reflektojnë siklet të madh.
“Nëse dëgjojmë deklaratat e Abdixhikut, e kuptojmë se ai është në një siklet të madh. Partia e tij është në një gjendje jo të mirë, ka mospajtime të brendshme dhe nuk ka dalë mirë në zgjedhjet lokale. Sikur të reflektonte, do të ulej me LVV-në dhe do të arrinim një marrëveshje koalicioni qeverisës, me të cilin tashmë do të kishim qeverinë,” shtoi Pacolli.
